Работилници
EN

Работилници

 

 

 

Во периодот од 27. септември до 1. октомври 2022 г., членовите на уметничката група ОПА (Опсесивно посесивна агресија), Слободанка Стевческа и Денис Сарагиновски, одржаа работилници насловена „Уште еден досаден воркшоп“ со фокус на дел од современите уметнички практики.

Во текот на работилницата, реализирана преку „досадни“ дискусии, презентации и практична колаборативна работа, ќе се навлезе во процес–ориентираните и практиките базирани на специфични (општествени) контексти. Методите и стратегиите кои ќе бидат разработувани се однесуваат на конципирање и развивање дела кои се надвор од традиционалните медиуми и практики, а се базирани на партиципативност, колаборативни пракси и/или тактички медиуми (дела кои комуникацијата со публиката ја остваруваат во јавниот простор или јавната сфера).

Работилницата е наменета за студенти и/или „млади“ луѓе (над 18 годишна возраст) со интерес за современата уметност и современите уметнички практики. Средбите ќе се одвиваат секој ден (од вторник 27.09 до сабота 1.10.) од 17 до 19 часот во Музејот на современата уметност – Скопје.

 

ОПА (Опсесивно посесивна агресија) е соработка основана во 2001 г., меѓу визуелните уметници Слободанка Стевческа и Денис Сарагиновски. Пристапот на ОПА е контекст-специфичен, вклучувајќи псевдо-документарци, тактички медиуми, стратегии на оверидентификација, субверзивна афирмација, итн. ОПА има остварено голем број на самостојни изложби и уметнички престои во повеќе европски градови, САД и Македонија, и има учествувано на бројни групни изложби и фестивали, меѓу кои и: „Трансмедиале“ (Берлин), „Трансеуропа – Европски театарски и перформанс фестивал“ (Хилдесхајм), „Freewaves – Биенале на нови медиуми“ (Лос Анџелес), „Биенале на современи уметности“ (Москва), „Арс Електроника“ (Линц), итн. ОПА е соосновач и активен член на Иницијативата Кооперација (2012-2015). [www.o-p-a.org]

Илустрацијата е генерирана со AI, Midjourney (prompt: one more boring art workshop)